Kwa akali Wapalestina 40 wameuawa shahidi katika Ukanda wa Gaza tangu alfajiri ya Jumamosi.
Kuuawa shahidi Wapalestina hao kunajirio sambamba na kuendelea mashambulizi makali ya anga na ubomoaji wa nyumba yanayofanywa na vikosi vya utawala haramu wa Israel. Hayo ni kwa mujibu wa shirika la habari la Palestina WAFA.
Duru za kitabibu ziliiambia WAFA kuwa “mashahidi 40 wameuawa katika Ukanda wa Gaza tangu alfajiri ya jana Jumamosi.
Mashahidi tisa walifika katika Hospitali ya Al-Shifa, 14 katika Hospitali ya Al-Ahli Arab Baptist, 10 katika Hospitali ya Al-Awda, mmoja katika Hospitali ya Nasser, na sita katika Hospitali ya Al-Aqsa.”
Karibu Wapalestina 66,000 wengi wao wakiwa ni wanawake na watoto wadogo wameuawa shahidi tangu Israel ianzishe vita na mauaji ya kimbari katika Ukanda wa Gaza Oktoba 7, 2023.
Wakati huo huo, Shirika la Umoja wa Mataifa la Kuhudumia Watoto (UNICEF) limetangaza kuwa zaidi ya watoto 26,000 katika Ukanda wa Gaza wanahitaji matibabu ya haraka kutokana na utapiamlo mkali.
Hayo yanajiri katika hali ambayo, Taarifa ya UNICEF ya hivi karibuni ilisema kuwa, hali katika mji wa Gaza na katika Ukanda wote huo ni mbaya sana, bila chakula au dawa, na mbaya zaidi, watu wanajua kwamba hakuna msaada wa kweli wa kimataifa kwao, na hali itazidi kuwa mbaya zaidi.