Rais wa Kenya William Ruto siku ya Alhamisi, Juni 4, amefanya ziara ya kiserikali katika ikulu ya rais jijini Pretoria, nchini Afrika Kusini. Nchi hizo mbili zilisaini mikataba mingi ya ushirikiano inayohusu uchumi, teknolojia, utamaduni, na mengineyo.
Imechapishwa:
Dakika 1 Wakati wa kusoma
Matangazo ya kibiashara
Na mwandishi wetu nchini Afrika Kusini, Valentin Hugues
Marais wote wawili walisisitiza umuhimu wa kuimarisha uhusiano wa pande mbili na kuhakikisha kwamba Afrika inazungumza kwa sauti moja katika hali ya siasa ya nchi na uhusiano wa kimataifa jinsi inavyoathiriwa au kuongozwa kidunia. Lakini bila kushangaza, suala jingine kubwa liliibuka: chuki dhidi ya wageni inayolikumba Afrika Kusini kwa sasa.
Kama Kenya ilitolea wito raia wake wanaoishi Afrika Kusini kuwa waangalifu sana katika hali ya maandamano ya chuki dhidi ya wageni, wakati wa ziara yake jijini Pretoria, Rais wa Kenya William Ruto alichagua kushughulikia sababu kuu za uhamiaji wa ndani ya Afrika.
“Nadhani sehemu ya changamoto inayoikabili Afrika Kusini ni kwamba ni nchi iliyoendelea zaidi. Kwa hivyo ni rahisi kwa baadhi kuja hapa kutafuta kazi na fursa. Suluhisho ni kuhakikisha kwamba kazi na fursa zipo kila mahali katika bara letu, ili watu wa bara hili waweze kustawi pamoja bila kusababisha migogoro isiyo ya lazima.”
Mwishoni mwa wiki iliyopita, angalau raia wawili kutoka Msumbiji waliuawa wakati wa maandamano makubwa ya kupinga uhamiaji kote Afrika Kusini, ambayo wakati mwingine hugeuka kuwa msako wa wageni. Mamia ya Waghana tayari wamekimbia nchi, na Nigeria na Malawi pia zimetangaza kuwarudisha baadhi ya raia wao nyumbani. Lakini pamoja na mwenzake wa Kenya, Rais wa Afrika Kusini Cyril Ramaphosa amechagua kuchukua hatua ya tahadhari zaidi. “Waafrika Kusini hawawachukii wageni. Watu wetu wanatuomba, kama viongozi, kushughulikia changamoto nyingi zilizoibuliwa na suala la uhamiaji.”
Rais wa Afrika Kusini pia alitangaza kutumwa kwa wajumbe kwenda nchi jirani kujadili suala la uhamiaji.