Nyota wa soka wa Ureno Cristiano Ronaldo anaandamwa na wimbi la ukosoaji mkali baada ya kushiriki kwenye dhifa ya chakula cha usiku iliyoandaliwa na Rais wa Marekani Donald Trump kwa ajili ya ujumbe wa Saudi Arabia.
Katika dhifa hiyo, Ronaldo alipigwa picha akiwasalimia wageni na akapiga pia picha za ‘selfie’ na shakhsia kadhaa mashuhuri akiwemo bilionea wa teknolojia Elon Musk.
Baada ya hafla hiyo, Ronaldo aliweka kwenye ukurasa wake wa mtandao wa kijamii picha aliyopigwa akiwa pamoja na Trump kwenye ofisi ya Oval, na kumshukuru rais huyo wa Marekani kwa “makaribisho ya bashasha” huku akielezea matumaini aliyonayo ya “kuhamasisha vizazi vipya kujenga mustakabali unaotokana na ujasiri, uwajibikaji na amani ya kudumu”.
Hata hivyo watumiaji mbalimbali wa mitandao ya kijamii wakiwemo wanaharakati, wanahabari na mashabiki wa Ronaldo mwenyewe wamemkosoa mwanasoka huyo kwa kukutana na kumsifia mwanasiasa anayehusishwa sana na sera kali dhidi ya wahamiaji na muungaji mkono mkubwa na wa kiukereketwa kwa utawala wa kizayuni wa Israel uliopata umaarufu duniani kwa mauaji ya kimbari ya Wapalestina na ubaguzi wa rangi wa apathaidi.
Mwandishi wa habari za michezo Leyla Hamed yeye amehoji uamuzi aliochukua Ronaldo wa kukutana na Trump kwa kuandika katika mtandao wa X: “kwa hivyo sasa ni sawa kabisa kutuma video ukiwa pamoja na wahalifu wa kivita?”
Katika ujumbe mwingine, Leyla Hamed ameambatanisha picha ya Kareem Abu Houli, mvulana Mpalestina mwenye umri wa miaka 13 ambaye “alipasuka tumbo” alipokuwa akicheza mpira wa miguu huku amevalia fulana ya jezi ya Ronaldo baada ya kulengwa na shambulio la anga la Israel lililopiga nyumba ya jirani yao katika Ukanda wa Ghaza mnamo mwaka 2024.
Pamoja na picha hiyo, mwanahabari huyo ameandika: “Cristiano Ronaldo anajiweka pamoja na watu wale wale waliohusika na mauaji ya maelfu ya watu wale wale ambao waliwahi kumpenda kupita kiasi”.
Mtumiaji mmoja wa mtandao wa Instagram yeye ameandika akimuuliza Ronaldo: “kaka unafanya nini hapo?”.
Baadhi ya maoni kwenye mitandao ya kijamii yameonyesha kusikitishwa zaidi na alama anayoacha mwanasoka huyo, yakidokeza kwamba, kwao wao, mkutano wa Ronaldo na Rais Trump umechafua sifa yake ya kutambulika na baadhi ya mashabiki wake kama ‘mwanasoka bora wa zama zote’…/