Jeshi la Sudan limeendelea kusonga mbele katika maeneo ya Kordofan Kaskazini na Kordofan Magharibi mwishoni mwa wiki, kufuatia mapigano makali na waasi wa Rapid Support Forces (RSF), kwa mujibu wa vyanzo vya kijeshi.
Mapigano mazito yalizuka katika eneo la kimkakati la Um Samima, takriban kilomita 50 magharibi mwa mji mkuu wa jimbo, El-Obeid, eneo linalounganisha Kordofan Kaskazini na Kordofan Magharibi. Vyanzo vya kijeshi vimedokeza kuwa jeshi linaendelea kusonga mbele Kordofan Kaskazini, likifanya mashambulizi kwa silaha nzito na nyepesi dhidi ya wapiganaji wa RSF katika Um Samima.
Vyanzo hivyo viliongeza kuwa jeshi na washirika wake wanasonga mbele pia katika mhimili wa magharibi mwa Al-Khuwayyi jimboni Kordofan Magharibi, takriban kilomita 100 kutoka El-Obeid.
Jumanne, jeshi la Sudan lilitangaza maendeleo makubwa katika medani za mapigano Kordofan, hatua ambayo wachambuzi wanaiona kama ishara ya kuelekea katika ukanda wa Darfur unaodhibitiwa na RSF.
Wakati huohuo, waasi wa RSF wamedai kupata ushindi katika maeneo ya Jabal Abu Sunun, Jabal Issa na Al-Ayyara Kordofan Kaskazini. Mnamo Oktoba 26, waasi wa RSF waliteka mji wa El-Fasher na kutekeleza mauaji ya raia, kwa mujibu wa mashirika ya ndani na ya kimataifa.
Kwa sasa RSF inadhibiti majimbo yote matano ya ukanda wa Darfur, huku jeshi likishikilia majimbo 13 yaliyosalia kusini, kaskazini, mashariki na katikati, ikiwemo mji mkuu Khartoum.
Jeshi la Sudan na waasi wa RSF wamekuwa katika vita vya maangamizi tangu Aprili 15, 2023. Mapigano haya yamesababisha vifo vya maelfu na kuwafukuza mamilioni, na kuibua moja ya majanga makubwa zaidi ya kibinadamu duniani.
Serikali ya Sudan inaituhumu Umoja wa Falme za Kiarabu (UAE) kwa kuunga mkono kifedha na kijeshi wanamgambo wa RSF, madai ambayo UAE imekanusha.