Mwenyekiti wa Chama cha Mpira wa Miguu Mkoa wa Dar es Salaam, Lameck Nyambaya, ameipongeza Yanga kwa kuanza vyema hatua ya makundi michuano ya kimataifa, huku akizitaka Simba, Azam na Singida Black Stars kuongeza juhudi na kubadili matokeo baada ya kupoteza mechi zao za kwanza.
Simba ilikubali kipigo cha bao 1–0 dhidi ya Petro Atletico ya Angola kwenye Uwanja wa Benjamin Mkapa, Dar es Salaam ikiwa ni mechi ya Ligi ya Mabingwa Afrika msimu wa 2025-2026, huku Azam na Singida Black Stars zikipoteza ugenini katika Kombe la Shirikisho Afrika.
Nyambaya amesema Yanga, ambayo ilianza kwa ushindi wa bao 1–0 dhidi ya AS FAR Rabat katika Ligi ya Mabingwa, inapaswa kutojisahau na badala yake kuongeza umakini kuelekea mechi ya pili dhidi ya JS Kabylie ya Algeria.
Ameongeza kuwa, Simba kama ilivyo kwa Azam na Singida Black Stars, bado ina nafasi ya kufanya vizuri katika mechi za wikiendi hii.