Gavana wa Jimbo la Darfur nchini Sudan, Minni Arko Minnawi, ameviambia vyombo vya habari kuwa, katika kipindi cha siku tatu tu Wasudan 27,000 waliuliwa na Vikosi vya Usaidizi wa Haraka (RSF) wakati wanamgambo wa vikosi hivyo walipoendeleza wimbi la mauaji baada ya kuuteka mji wa el-Fasher mwishoni mwa mwezi uliopita.
Minnawi ameeleza hayo akiwa kwenye makao yake makuu ya muda huko Port Sudan, ambako makamanda wa Vikosi vya Jeshi la Sudan (SAF) na wa serikali ya Sudan wamepiga kambi kwa muda mrefu tangu mapigano yalipozuka katika mji mkuu Khartoum zaidi ya miaka miwili iliyopita.
Gavana huyo, ambaye yeye mwenyewe anatoka Kaskazini mwa Darfur na anatokana na jamii ya Zaghawa ambayo imekuwa ikilengwa na RSF amesema, katika watu wa familia yake mwenyewe “wengi wao waliangamizwa” katika mauaji ya halaiki ya El-Fasher.
Idadi ya watu 27,000 iliyotolewa na Minnawi ni kubwa zaidi kuliko makadirio ya awali ya kiwango cha mauaji yaliyojiri kufuatia kuondoka ghafla Vikosi vya Jeshi la Sudan (SAF) katika mji huo ambao ni makao makuu ya jimbo la Darfur Kaskazini mwishoni mwa Oktoba.
Hapo awali, maafisa na wafanyakazi wa utoaji misaada ya kibinadamu walikadiria idadi ya vifo kuwa ni zaidi ya watu 2,500.
Hata hivyo, katika kipindi cha siku na wiki zilizofuata baada ya kutekwa mji wa el-Fasher na wanamgambo wa RSF, ambao ulikuwa imezingirwa kwa zaidi ya siku 550, kumekuwa na msururu wa ripoti zinazotolewa za mauaji makubwa ya halaiki huku wafanyakazi wa misaada wakionyesha wasiwasi kutokana na kuwepo raia wachache tu walioweza kuukimbia mji huo.
Walionusurika wamevieleza vyombo vya habari kuhusu mauaji, udhalilishaji wa kingono na aina zingine za manyanyaso waliyofanyiwa na wanamgambo wa RSF.
Tangu vita vya wenyewe kwa wenyewe vilipozuka nchini Sudan Aprili 2023 vikichochewa na mipango ya kuiingiza RSF kwenye vikosi vya jeshi la kawaida, wanamgambo wa kundi hilo wanaoongozwa na Muhammad Hamdan Dagalo vimetuhumiwa kuhusika na uhalifu wa kivita na ukatili, ikiwa ni pamoja na mauaji ya halaiki na udhalilishaji wa kingono…/