Shirika la Umoja wa Mataifa la Kutoa Misaada na Ajira kwa Wakimbizi wa Palestina (UNRWA) limesema, hali ya kibinadamu katika Ukanda wa Ghaza ingali ni ya majanga licha ya kusitishwa mapigano, na kuonya kwamba vizuizi vinavyowekwa na utawala wa kizayuni wa Israel kwa uingizaji wa misaada vinaifanya hali ya eneo hilo isiweze kuboreka.
Msemaji wa UNRWA, Adnan Abu Hasna, amethibitisha kwamba Israel inaendelea kuzuia kuingia wafanyakazi wa kimataifa wa shirika hilo katika Ukanda wa Ghaza na kubana kiwango cha misaada ya kibinadamu inayoingizwa katika eneo hilo, na kuacha malori ya chakula yapatayo 6,000 yakiwa yamekwama kwenye vivuko vya mpakani.
Abu Hasna amebainisha kuwa zaidi ya asilimia 90 ya Wapalestina wa Ghaza kwa sasa wanategemea kikamilifu misaada ya kibinadamu, huku familia nyingi zikipokea mlo mmoja tu kila baada ya saa 24.
Amefafanua kuwa, japokuwa wastani wa malori 170 ya misaada yanaingia Ghaza kila siku, lakini kiwango hicho ni cha chini sana kulinganisha na kile kinachohitajika ili kukidhi mahitaji ya msingi.
Kwa sasa UNRWA inasimamia makazi 100 yanayowahifadhi zaidi ya watu 80,000 waliolazimika kuyahama makazi yao, huku ikiendelea kutoa elimu kupitia mawasiliano ya mbali kwa wanafunzi wapatao laki tatu na masomo ya ana kwa ana kwa wengine 50,000 chini ya mazingira magumu sana.
Kwa mujibu wa shirika hilo la UN, karibu watoto 48,000 wanahudhuria madarasa ya muda katika nafasi 330 za kujifunzia za muda katika makazi 59. Wengi wanalazimika kukaa kwenye ardhi baridi kutokana na ukosefu wa madawati au viti, jambo ambalo linaathiri vibaya mchakato wa kujifunza na kuathiri hisia za usalama na utulivu wa watoto.
Hayo yanajiri huku hali ya huduma za kibinadamu ikiendelea kuporomoka kutokana na vita vya kinyama vilivyoanzishwa na utawala wa kizayuni wa Israel dhidi ya Ghaza, tangu Oktoba 7, 2023. Mashambulizi na uharibifu mkubwa umesababisha skuli nyingi na vifaa vya elimu kutoweza kutumika tena, na kuifanya UNRWA ilazimike kubadilisha makazi ya dharura kuwa madarasa ya muda ili kushughulikia mahitaji ya haraka ya kielimu ya watoto waliobaki bila makazi…/