BAADA ya kukosekana uwanjani kwa muda mrefu, kipa wa Azam FC, Aishi Manula amesema anapambana kwa nguvu kumshawishi kocha Florent Ibenge ampe nafasi kwani yupo tayari kuitumikia timu hiyo.
Manula aliyerejea Azam msimu huu baada ya kumaliza mkataba akiwa na Simba, hajacheza mechi yoyote ya mashindano tangu atue hapo, huku kikosi hicho kikiwatumia makipa Zuberi Foba na Issa Fofana raia wa Ivory Coast aliyesajiliwa akitokea Al Hilal ya Sudan.
Manula ambaye wikiendi iliyopita Novemba 23, 2025 alikuwa benchi wakati Azam ikilala mabao 2-0 mbele ya AS Maniema ya DR Congo katika mechi ya kwanza ya Kundi B ya Kombe la Shirikisho Afrika, aliyodaka Foba, amesema uzoefu na historia havitoshi kumfanya kocha ampe nafasi, bali ni kuonyesha uwezo kwenye uwanja wa mazoezi ili kumshawishi.
“Nimecheza mechi nyingi, toka kule nilipotoka (Simba) hadi hapa leo (Azam). Na kwa ujumla, uwepo wangu kwenye klabu hii ni kuongeza ile chachu upande wa magolikipa na timu kwa ujumla kuwa na wachezaji wazoefu wa michuano hii ya kimataifa, “ alinukuliwa Manula na Azam Tv.
“Nadhani hiyo binafsi naona haitoshi kwa kumfanya mwalimu anipe nafasi ya kucheza, lakini itatosha mimi pale nitakapopambana na kumuonyesha kwamba sasa muda umefika wa kupata nafasi ya kucheza.
“Mazoezini ni sehemu pekee ya kumuonyesha mwalimu maana mpira ni mchezo wa wazi na historia haitoshi kumfanya anipe nafasi ya kucheza, bali ni jitihada ambazo anaziona na unavyopambana na anapokuona upo tayari.”
“Kama nilivyosema nilikuwa napitia changamoto nyingi nilipokuwa, lakini sasa nimeweza kurejea na kuendelea kupambana kumuonyesha mwalimu kwamba kulingana na uzoefu niliokuwa nao lakini ukijumlisha na jitihada ninazozionyesha mazoezini basi itampa yeye sababu ya kuona kama natosha kupewa nafasi ya kucheza.”
Kabla ya kutua Azam, mara ya mwisho Manula kudaka katika mechi ya mashindano ngazi ya klabu ilikuwa Machi 6, 2024, alipokaa langoni wakati Simba ikilala mabao 2-1 mbele ya Tanzania Prisons na tangu hapo, hakuidakia Simba mechi ya mashindano hadi mkataba wake ulipoisha mwisho wa msimu wa 2024-2025 na kurejea Azam aliyoondoka 2017 aliposajiliwa na Simba. Wakati akipitia wakati mgumu ndani ya klabu, Manula aliitwa katika kikosi cha timu ya taifa, Taifa Stars kilichoshiriki Fainali za Mataifa ya Afrika kwa Wachezaji wa Ndani (CHAN) 2024, zilizoandaliwa na Tanzania kwa kushirikiana na Kenya, Uganda kuanzia Agosti 2, 2025 hadi Agosti 30, 2025. Hata hivyo, hakucheza kwani Yakoub Suleiman alidaka zote.