Ali Larijani, Katibu wa Baraza Kuu la Usalama wa Taifa la Jamhuri ya Kiislamu ya Iran, amewasili Islamabad na kukutana na kushauriana na maafisa wa Pakistan katika ziara rasmi ya siku mbili.
Mara baada ya kuwasili mjini Islamabad jana Jumanne, Novemba 25, 2025, Ali Larijani alisema: “Pakistan ni nchi muhimu katika eneo hili na ina nafasi ya pekee kutokana na ushawishi wake na katika suala zima la usalama wa ukanda huu.”
Katibu wa Baraza Kuu la Usalama wa Taifa la Iran pia amesema kuwa: “Ushirikiano kati ya Tehran na Islamabad katika nyanja mbalimbali ni nguzo muhimu ya kudumisha amani na utulivu kwenye eneo hili zima.”
Larijani amebainisha pia kwamba: “Pakistan, jirani wa mashariki wa Iran, ni nchi muhimu katika upande wa kiutamaduni, na kwamba uhusiano kati ya nchi hizi mbili umekuwa wa kina na wa kihistoria kwa muda mrefu.”
Ratiba ya Katibu wa Baraza Kuu la Usalama wa Kitaifa la Iran huko nchini Pakistan ni kukutana na viongozi wa kisiasa na kijeshi wa ngazi za juu wa nchi hiyo katika kipindi chote cha ziara yake ya siku mbili na ameonana kwa nyakati tofauti na Waziri Mkuu wa Pakistan Shehbaz Sharif, Rais Asif Ali Zardari na Spika wa Bunge la Taifa la Pakistan, Sardar Ayaz Sadiq. Matukio ya hivi karibuni yanayohusiana na uhusiano wa pande mbili kati ya Iran na Pakistan, matukio ambayo yamejitokeza baada ya kufikiwa makubaliano ya pamoja na vilevile matukio ya kikanda na kimataifa bila ya kusahau masuala muhimu ya Ulimwengu wa Kiislamu ni miongoni mwa ajenda ya mashauriano ya Larijani na viongozi wa ngazi za juu wa nchi rafiki na jirani ya Pakistan.
Kustawishwa uhusiano wa Iran na Pakistan ni jambo muhimu kimkakati si tu kwa nchi hizi mbili, bali pia kwa eneo lote la kusini na magharibi mwa Asia. Ziara ya Ali Larijani huko Islamabad na kutilia mkazo kwake nafasi maalumu ya Pakistan katika milingano ya usalama wa kikanda ni ushahidi wa wazi wa umuhimu wa ziara hiyo ya Katibu wa Baraza Kuu la Usalama wa Taifa la Iran nchini Pakistan.
Ukweli ni kwamba Iran inaweza kuwa chanzo muhimu cha nishati kwa Pakistan, na kwamba mradi wa bomba la gesi la Iran na Pakistan ni mfano wa wazi wa uwezo huo. Iran na Pakistan pia zina uwezo mkubwa na nafasi nyingi za ushirikiano katika nyanja za nishati, biashara na usafiri.
Ukaribu wa kijiografia na idadi kubwa ya watu wa nchi hizo mbili pia ni fursa nzuri ya kukuza biashara ya mpakani na kuongeza mauzo ya kusafirisha nje na pia kuingiza bidhaa za kigeni. Bandari ya Gwadar ya Pakistan inayafikia maji ya Ghuba ya Uajemi, suala ambalo linaweza kuinufaisha Iran na kuipa fursa ya kuanzisha njia mpya za usafiri za kuyaunganisha maeneo muhimu ya Asia ya Kati na Asia Magharibi na maeneo ya nje na ya kimataifa kama vile China.
Tehran na Islamabad zina misingi mizuri pia ya ushirikiano katika kupambana na ugaidi, biashara haramu ya dawa za kulevya na ukosefu wa usalama wa mipakani. Hivyo ni vitisho vya kila siku ambavyo vinatoa fursa ya ushirikiano mkubwa zaidi katika jitihada za kudumisha usalama, utulivu na amani kwenye eneo hili.
Kwa kutilia maanani uhusiano wake na China na nchi za Kiislamu, Pakistan inaweza kuchukua jukumu la kuendana na sera ya Iran dhidi ya siasa za kibeberu za Marekani. Uanachama wa nchi mbili za Iran na Pakistan katika jumuiya za kikanda kama vile Jumuiya ya Ushirikiano wa Kiislamu (OIC) na Jumuiya ya Ushirikiano wa Kiuchumi (ECO) unaweza kufungua njia mpya za ushirikiano katika nyanja mbalimbali za kikanda na kimataifa baina ya nchi hizi mbili.
Nchi mbili za Iran na Pakistan zinaunganishwa na mambo mengi muhimu ya Kiislamu na kiutamaduni; lugha ya Kiajemi ina nafasi muhimu katika historia ya Pakistan, na washairi na wanafikra wengi wa Pakistani wameathiriwa na utamaduni wa Iran kupitia lugha hiyo ya Kifarsi. Mahusiano ya Iran na Pakistan yanatiliwa nguvu za jadi na zisizofutika za maingiliano ya kiutamaduni na kidini, na mahusiano hayo ambayo yanaelea ndani ya mishipa ya damu ya wananchi wa mataifa haya mawili, yanaweza kuwa msingi wa kuimarisha ushirikiano wa leo wa nchi zao.
Ushirikiano wa Iran na Pakistan pia unaweza kusaidia kupunguza mivutano nchini Afghanistan na eneo la kusini mwa Asia. Ukaribu wa Tehran na Islamabad unaweza kuunda nguvu za kukabiliana na ushawishi wa madola ajinabi yasiyozipendea kheri nchi za eneo hili. Mahusiano haya yanaweza kuwa mfano wa ushirikiano na kigezo chema kwa nchi za Kiislamu katika ukanda huu na kusaidia kuimarisha mshikamano wa ulimwengu wa Kiislamu. Pia, ushirikiano wa nchi mbili za Iran na Pakistan katika kupinga siasa za upendeleo wa upande mmoja za Marekani unaweza kuimarisha nafasi ya nchi hizo mbili katika milingano ya kimataifa.
Kiujumla ni kwamba, kustawishwa uhusiano wa Iran na Pakistan ni jambo la dharura la kimkakati ambalo limejiwekea kinga kwenye mambo ya kawaida ya kihistoria na kiutamaduni, maslahi ya pamoja ya kiuchumi na mahitaji ya usalama wa kikanda. Ushirikiano huu si tu una manufaa kwa nchi hizo mbili, lakini pia unaweza kusaidia kudumisha utulivu, kuleta maendeleo na kukabiliana na siasa za kibeberu za dola lolote lile. Kwa kuzingatia yote hayo tutaona kuwa, ziara ya Katibu wa Baraza Kuu la Usalama wa Taifa la Iran huko Islamabad na kuonana kwake na viongozi wa ngazi za juu wa kisiasa na kijeshi wa Pakistan ina umuhimu mkubwa.