Dar es Salaam. Mahakama ya Hakimu Mkazi Kisutu, imepanga Disemba 12, 2025 kutoa hukumu katika kesi ya kutishia kuua na kujeruhi inayowakabili wanafunzi watatu wa vyuo vikuu nchini.
Washtakiwa katika kesi hiyo ya jinai namba 13199 ya mwaka 2025 ni Mary Matogolo (22) ambaye ni mwanafunzi wa Chuo Kikuu cha Dar es Salaam (UDSM).
Ryner Ponci Mkwawili wa Chuo Kikuu Ardhi Dar es Salaam na Asha Suleiman Juma, mwanafunzi wa Chuo cha Uhasibu, Dar es Salaam (TIA).
Uamuzi huo umetolewa leo Ijumaa Novemba 28, 2025 na Hakimu Mkazi Mkuu wa mahakama hiyo, Gwantwa Mwankuga, baada ya washtakiwa hao kumaliza kujitetea.
“Baada ya washtakiwa kumaliza kutoa utetezi wao, mahakama hii inapanga Desemba 12, mwaka huu kutoa hukumu dhidi yenu,” amesema Hakimu Mwankuga na kisha kuahirisha kesi hiyo.
Hata hivyo washtakiwa wote wapo nje kwa dhamana.
Awali, Wakili wa Serikali Mwandamizi, Gabriel Kamugisha alidai kuwa kesi hiyo imeitwa kwa ajili ya upande wa utetezi kuendelea kutoa ushahidi, kwa mshtakiwa wa tatu katika kesi hiyo, Asha Suleiman Juma, mwanafunzi wa Chuo cha Uhasibu, Dar es Salaam (TIA) kumalizia ushahidi wake.
Hata hivyo mshtakiwa huyo alidai yupo tayari kutoa ushahidi na hivyo kuendelea kutoa ushahidi.
Katika ushahidi wake alidai kuwa hawafahamu wenzake na kwamba hausiki na tuhuma hizo, hiyo aliomba Mahakama imwachie huru.
Baada ya kumaliza kutoa ushahidi wake, upande wa utetezi ulifunga ushahidi wao wa mashahidi watatu ambao ni wanafunzi hao na kisha mahakama kupanga tarehe kwa ajili ya kutoa hukumu ambayo ni Desemba 12, 2025.
Itakumbukwa kuwa Novemba 21, 2025 washtakiwa hao walikutwa na kesi ya kujibu na kutakiwa kuanza kujitetea Novemba 26, 205.
Hatua hiyo ilitokana na Mahakama kupitia ushahidi wa mashahidi 10 na vielelezo 16 vilivyotolewa na upande wa mashtaka na hivyo kuwakuta na kesi ya kujibu.
Hata hivyo, wakili wa utetezi Peter Shapa aliieleza mahakama hiyo kuwa anatarajia kuwa na mashahidi watatu ambao ni wanafunzi hao.
Kwa mara ya kwanza, washtakiwa hao walifikishwa mahakamani hapo Mei 30, 2025 na kusomewa mashtaka hayo.
Kesi ya msingi:
Kwa pamoja washtakiwa wanadaiwa Machi 14, 2025, eneo la Sinza wilayani Ubungo, Dar es Salaam walikula njama kwa nia ya kutenda kosa la kuchapisha taarifa za uongo.
Shtaka la pili ambalo ni kusambaza taarifa za uongo linawakabili Mary na Asha, ambapo anadaiwa kuwa siku hiyo walisambaza taarifa za uongo, katika mtandao wa WhatsApp yenye maneno kuwa “Toa sauti umefanya mapenzi na Mwijaku lini na wapi”.
Shtaka la tatu ambalo pia ni kusambaza taarifa za uongo linalomkabili, Ryner peke yake, anadaiwa kuwa siku hiyo alisambaza taarifa hizo kupitia mtandao wa WhatsApp.
Shtaka la nne ambalo ni kusababisha madhara makubwa, linamkabili Mary peke yake, akidaiwa kuwa siku hiyo alimshambulia Magnificant Kimario kwa kumpiga kichwani na chuma na hivyo kumsababishia maumivu makali.
Shtaka la tano ambalo ni kusababisha madhara makubwa, ambalo linawakabili washitakiwa wote.
Inadaiwa kuwa washtakiwa hao kwa pamoja kwa kutumia nguvu walimvuta nywele Magnificati na kusababisha madhara makubwa.
Shtaka la sita na saba, ni kuharibi mali, pia yanamkabili Mary peke yake, ambapo aliharibu laini ya simu na simu aina ya Samsung yenye thamani ya Sh700,000, mali ya Magnificati.
Shtaka la nane ni kutishia kuua, linawakabili washtakiwa wote, ambapo wanadaiwa siku ya tukio, walimtishia kumuua. Magnificati kwa kutumia kisu.