Liverpool, England. Kocha wa Liverpool aliyepo kwenye presha, Arne Slot, ameambiwa aendelee kupambana na kutokuwa na wasiwasi na maneno kutoka nje kuhusu usalama wa nafasi yake ya kazi, kufuatia mwenendo mbaya wa timu yake.
Mabingwa wa Ligi Kuu ya England wamepoteza mechi tisa kati ya kumi na mbili zilizopita na vipigo viwili vya aibu wiki hii kwenye Uwanja wa Anfield dhidi ya Nottingham Forest na PSV Eindhoven vimesababisha baadhi ya mashabiki kuitisha Slot atimuliwe.
Gazeti la Daily Mail Sport iliripoti Alhamisi asubuhi kwamba Slot bado anaungwa mkono na uongozi wa juu wa Liverpool, kwa mujibu wa vyanzo vya karibu na klabu na kocha huyo.
Na alipohojiwa kama amezungumza na wakubwa wa klabu baada ya kipigo cha 4-1 kutoka kwa mabingwa wa Uholanzi PSV, alisema: “Tumekuwa na mazungumzo yale yale tangu nilipofika hapa. Sijui kama nilisema jana usiku, lakini tunaendelea kupambana, tunajaribu kuboresha ndicho sote tunachojaribu kufanya. Lakini mazungumzo yameendelea kuwa kama yalivyokuwa kwa mwaka mmoja na kitu.”
Slot amesisitiza kuwa timu yake inaonyesha mapambano ya kutosha kugeuza mwenendo wao mbaya kabla ya safari ya kwenda London kukutana na West Ham Jumapili.
“Katika dakika 85 za mwanzo (dhidi ya PSV), au sehemu kubwa ya mchezo, niliiona timu ambayo imepata misukosuko mingi hivi karibuni lakini bado iliweza kupambana,” aliongeza.
“Sio kila mara kwa matokeo tungependa, kwa sababu kupambana ni sehemu tu ya kile kinachohitajika. Kama kupambana kungetosha kushinda mechi basi mpira ungekuwa rahisi sana. Unahitaji kitu cha ziada ubora katika hali za mmoja dhidi ya mmoja, mipira ya krosi na kufika kwa wakati sahihi. Lakini naiona timu ambayo haikati tamaa. Naona kwenye takwimu za mbio, kwenye nafasi tunazounda hata tukishapoteza mwelekeo. Nakubali dakika tano au kumi za mwisho dhidi ya Forest na dakika tano au kumi za mwisho jana hazikuwa sawa na dakika nyingine. Kwangu, hilo halimaanishi timu haina roho ya kupambana labda katika dakika za mwisho, lakini si katika sehemu nyingine za mchezo.”
Slot aliandaa mkutano wake na waaandishi kabla ya mechi siku ya Alhamisi alasiri, muda ambao si wa kawaida, kwa sababu wachezaji wa Liverpool hawakufanya mazoezi Ijumaa. Hata hivyo, watafanya mazoezi ya kujenga mwili upya kisha watakuwa na kikao cha mazoezi Jumamosi kabla ya kusafiri kwenda London.
Kocha huyo mkuu ameombwa kufanya mabadiliko ya kikosi, na atafarijika kwa kurejea kwa mlinda mlango namba moja, Alisson, aliyekosa mechi dhidi ya PSV kutokana na kuumwa. Mlinda mlango huyo wa Brazil alifanya mazoezi juzi Alhamisi.
Florian Wirtz, ambaye amekosa mechi mbili zilizopita, anatarajiwa kufanya mazoezi leo Jumamosi, huku jeraha la Hugo Ekitike, aliyelazimika kutoka nje kutokana na maumivu ya mgongo, likionekana si kubwa. Ana shaka ya kucheza Jumapili, lakini bado ana nafasi.