Mafuriko makubwa na maporomoko ya ardhi yamesababisha vifo vya takriban watu 90 nchini Indonesia wiki hii, baada ya mvua kubwa isiyo ya kawaida kunyesha katika kisiwa cha Sumatra.
Kanda za video zinaonyesha maji ya mafuriko yakivunja kingo za mito, wakazi wakilazimika kupita kwenye maji yaliyowafikia kifuani, huku magari na nyumba zikizama karibu kabisa mara nyingi paa pekee ndivyo vinavyoonekana.
Juhudi za uokoaji zinaendelea, lakini zimeathiriwa na kukatika kwa umeme pamoja na maporomoko ya matope, jambo linalowazuia waokoaji kuwafikia watu waliokwama maeneo hatarishi.
Wakati huo huo, Sri Lanka nayo inakabiliwa na moja ya maafa zaidi ya hali ya hewa katika miaka ya karibuni, ambapo takriban watu 56 wamefariki na wengine 21 hawajulikani walipo kutokana na mafuriko na maporomoko ya ardhi katika maeneo mbalimbali ya nchi.
Katika wilaya ya kati ya Badulla, maarufu kwa mashamba ya chai, watu 21 walifariki dunia baada ya maporomoko ya ardhi kusomba nyumba zao usiku kucha, kwa mujibu wa taarifa ya Kituo cha Kudhibiti Maafa (DMC).
Video zilizosambaa mitandaoni zinaonyesha nyumba zikichukuliwa na maji, mitaa ikifurika vibaya, na huduma nyingi za treni zikifutwa nchini kote kutokana na uharibifu wa miundombinu.
Serikali ya Sri Lanka imeanza maandalizi kukabiliana na hali mbaya zaidi ya hewa kufikia Ijumaa, wakati Kimbunga Ditwah kikisonga kando ya pwani ya mashariki ya nchi hiyo, kikiwa kimeongeza taharuki juu ya uwezekano wa kuongezeka kwa madhara.