Ripoti mbalimbali za vyombo vya habari zimesema kuwa, mashambulio ya Ijuuma dhidi ya meli mbili za mafuta za Russia katika Bahari Nyeusi yamefanywa na shirika la kijasusi la Ukraine na jeshi la wanamaji la nchi hiyo.
Shirika la Habari la Fars limekinukuu chombo kimoja cha Ukraine kikisema kwamba, ndege zisizo na rubani za nchi hiyo zimeshambulia meli mbili za mafuta za Russia ziitwazo “Kairos” na “Virat” katika Bahari Nyeusi kwa kushirikiana na jeshi la majini.
Kwa upande wake, tovuti ya UNN nayo imeripoti habari hiyo na kusema kuwa, droni na ndege zisizo na rubani za Ukraine zimezipiga meli hizo mbili za Russia kwa kudhani kwamba zina shehena ya mafuta yenye thamani ya karibu dola milioni 70. Tovuti hiyo imedai kuwa, meli hizo za Russia zilikuwa kwenye jaribio la kukwepa vikwazo ilivyowekewa Moscow.
Mashambulio dhidi ya meli za mafuta za Kairos na Virat za Russia yamefanywa na jeshi la Ukraine katika kile ambacho nchi hiyo imedai kuwa ni kupambana na ujasusi. Hata hivyo habari nyingine zimesema kuwa, meli zote mbili zilikuwa tupu wakati ziliposhambuliwa na hazikuwa na shehena yoyote ya mafuta.
Taarifa hiyo imeongeza kuwa meli ya Kairos ya Russia ilikuwa imewekwa vikwazo na Uingereza na Umoja wa Ulaya lakini Marekani haikuwa imeiwekea vikwazo. Safari yake ya mwisho ilikuwa ni kutoka bandari ya Novorossiysk ya Russia kuelekea bandari ya Paradip ya India. Wakati iliposhambuliwa juzi Ijumaa na jeshi la Ukraine, meli hiyo ya Russia ilikuwa inarejea nyumbani kutokea India ili kupakia shehena nyingine ya mafuta. Meli ya pili ya Virat imewekewa vikwazo na Marekani na Umoja wa Ulaya na tangu mwezi Januari 2025 ilikuwa imekaa bila ya kufanya shughuli zozote katika Bahari Nyeusi.