Dar es Salaam. Watahiniwa 133,655 wanatarajiwa kufanya Mtihani wa kumaliza kidato cha sita (ACSEE) wa mwaka 2026, unaoanza kesho Jumatatu, Mei 4, 2026 Tanzania.
Mbali nao pia watahiniwa 14,679 wa mafunzo ya ualimu watafanya mitihani katika kipindi hicho baada ya Baraza la Mitihani la Tanzania (Necta) kukamilisha maandalizi yote.
Leo Jumapili, Mei 3, 2026, akizungumza na waandishi wa habari jijini Dar es Salaam, Katibu Mtendaji wa Necta, Profesa Said Mohamed amesema mtihani wa ACSEE utafanyika katika shule za sekondari 1,068 na vituo 226 kwa watahiniwa wa kujitegemea huku mitihani ya ualimu itafanyika katika vyuo 104 nchini kote.
Kati ya watahiniwa wa ACSEE, 126,578 ni wa shule na 7,077 ni wa kujitegemea. Miongoni mwa watahiniwa wa shule, 64,187 ni wanaume (asilimia 50.71) na 62,391 ni wanawake (asilimia 49.29).
Jumla ya watahiniwa 214 wana mahitaji maalum, wakiwemo 178 wenye uoni hafifu, 18 wasioona (vipofu), watano wenye ulemavu wa kusikia na 13 wenye ulemavu wa viungo.
Kwa upande wa watahiniwa wa kujitegemea, 4,259 ni wanaume (asilimia 60.18) na 2,818 ni wanawake (asilimia 39.82). Kundi hili linajumuisha watahiniwa 15 wenye mahitaji maalum, ambapo 14 wana uoni hafifu na mmoja ni kipofu.
Profesa Mohamed amesema mitihani ya ualimu inahusisha watahiniwa wa mitaala mipya na ya zamani ambapo katika mtaala mpya, watahiniwa 12,789 watafanya mitihani ya stashahada.
Stashahada ya Ualimu wa Elimu ya Msingi ina watahiniwa 10,674, wakiwemo wanaume 3,830 (asilimia 35.88) na wanawake 6,844 (asilimia 64.12).
Stashahada ya Elimu ya Awali ina watahiniwa 1,379, wakiwemo wanaume 317 (asilimia 22.99) na wanawake 1,062 (asilimia 77.01) huku Stashahada ya Elimu Maalum ikiwa na watahiniwa 736, wakiwemo wanaume 326 (asilimia 44.29) na wanawake 410 (asilimia 55.71).
“Jumla ya watahiniwa 42 wenye mahitaji maalum wamesajiliwa chini ya mtaala mpya, wakiwemo 17 wenye uoni hafifu, 18 vipofu, wawili wenye matatizo ya kusikia na watano wenye ulemavu wa viungo,” amesema.
Katika mtaala wa zamani, watahiniwa 1,540 watafanya mtihani wa Stashahada ya Sayansi na Hisabati, wakiwemo wanaume 1,017 (asilimia 66.04) na wanawake 523 (asilimia 33.96). Watahiniwa wawili katika kundi hili wana mahitaji maalum.
Watahiniwa wanaorudia ni 329 kwa Stashahada ya Ualimu wa Sekondari na 21 katika ngazi ya cheti.
Profesa Mohamed amesema mitihani ya ualimu itakamilika Mei 18, huku mtihani wa ACSEE ukimalizika Mei 25, 2026.
Amesema Necta imekamilisha usambazaji wa vifaa vya mitihani na kamati za mikoa na wilaya zimewafundisha wasimamizi na kukagua vituo ili kuhakikisha utayari.
“Mtihani wa ACSEE ni muhimu katika kupima uwezo wa kitaaluma wa wanafunzi na kuamua kujiunga na elimu ya juu, huku mitihani ya ualimu ikilenga kuzalisha walimu wenye sifa kwa shule za msingi,” amesema.
Necta imewataka wadau wote kuhakikisha uadilifu katika mitihani huku wasimamizi wakitakiwa kuzingatia weledi na haki.
“Watahiniwa, wakiwemo wenye mahitaji maalum, watapatiwa msaada kama vile karatasi za nukta nundu (Braille), maandishi yaliyokuzwa na muda wa ziada pale inapohitajika,” amesema.
Profesa Mohamed alionya dhidi ya udanganyifu katika mitihani, akisema mgombea yeyote atakayebainika kufanya udanganyifu atafutiwa matokeo yake.
Wakuu wa shule na wamiliki wa vituo pia wameonywa kutoingilia mchakato huo, huku umma ukihimizwa kusaidia kuwepo kwa mazingira ya mitihani yenye amani na usalama.