Chad imeanza maombolezo ya kitaifa ya siku tatu Alhamisi ili kuwaenzi wanajeshi waliouawa katika mashambulizi ya hivi karibuni ya kigaidi katika eneo la Ziwa Chad.
Imechapishwa:
Dakika 1 Wakati wa kusoma
Matangazo ya kibiashara
Wanajeshi ishirini na watatu waliuawa na wengine 26 walijeruhiwa siku ya Jumatatu katika shambulio la wanamgambo wa Boko Haram kwenye kambi ya kijeshi kwenye Kisiwa cha Barka Tolorom katika eneo hilo.
Siku ya Jumatano jioni, Rais wa Chad Mahamat Idriss Déby Itno alisaini amri ya kuanzisha kipindi cha maombolezo ya kitaifa.
“Katika kipindi hiki, bendera zitapeperushwa nusu mlingoti na sherehe zote ni marufuku. Ni muziki na sala za kidini pekee zinazoruhusiwa katika vyombo vya habari na maeneo ya ibada,” amri hiyo inasema.
Tangazo hili la maombolezo ya kitaifa linakuja saa chache tu baada ya shambulio lingine baya la Boko Haram dhidi ya wanajeshi katika eneo la Ziwa Chad kuripotiwa na vyombo vya habari vya ndani siku ya Jumatano. Hakuna idadi rasmi ya vifo iliyotolewa.
Kanda ya Ziwa Chad, ambayo inapakana na Nigeria, Niger, na Cameroon, imekuwa ikilengwa na mashambulizi ya Boko Haram na tawi lingine la kundi lililojitenga, la Islamic State West Africa Province (ISWAP).