Waziri wa Mambo ya Nje wa Jamhuri ya Kiislamu ya Iran amesema Wakala wa Kimataifa wa Nishati ya Atomiki (IAEA) lazima litimize maagizo liliyokabidhiwa ya kiufundi, lijiepushe na mielekeo ya kisiasa, na kukataa mashinikizo yanayotolewa na Marekani na washirika wake wa Ulaya.
Sayyid Abbas Araghchi ametoa kauli hiyo katika mazungumzo aliyofanya kwa njia ya simu na Waziri wa Mambo ya Nje wa Russia Sergei Lavrov.
Mazungumzo hayo ya simu yaliyofanyika jana Jumatatu, yalikuwa ya pili kati ya mawaziri hao wawili katika kipindi cha wiki moja na kabla ya mkutano ujao wa Bodi ya Magavana ya IAEA, ambapo Marekani na Troika ya Ulaya, inayoundwa na Uingereza, Ufaransa, na Ujerumani, zikitarajiwa kuwasilisha azimio dhidi ya Iran kuhusu ushirikiano wake na wakala huo.
Araghchi amesema, siku zote Tehran imekuwa ikitumia muelekeo wa “ujengaji na uwajibikaji” katika ushirikiano wake na IAEA.
Amebainisha kuwa, Iran imechukua hatua na kufanya mashauriano ya kidiplomasia na nchi za kikanda kwa lengo la kudumisha amani na utulivu.
Waziri wa Mambo ya Nje wa Jamhuri ya Kiislamu ya Iran alisisitiza kwamba mchakato kama huo unapasa kuendelezwa kwa ushiriki wa pande zote husika.
Hayo yanajiri katika hali ambayo, Tehran imeonya kwamba itafanya “mapitio ya msingi” katika ushirikiano wake na Wakala wa Kimataifa wa Nishati ya Atomiki ikiwa Bodi ya Magavana yenye wanachama 35 itapitisha azimio jipya dhidi ya Iran.
Katika mazungumzo ya simu na mwenzake wa Iran, Waziri wa Mambo ya Nje wa Russia amekaribisha kuanzishwa kwa mfumo wa ushirikiano wa kikanda na kuelezea utayari wa Moscow wa kuendelea kufanya uratibu na mashauriano ya karibu na Tehran.
Sergey Lavrov ameashiria juhudi zinazofanywa na Russia katika Umoja wa Mataifa ili kulinda kanuni za Mkataba wa umoja huo.
Kuhusu suala la Palestina, Lavrov amesema, nchi yake inaunga mkono haki ya watu wa Palestina ya kujiamulia mustakabali wao. Amesema Moscow haikubaliani na hatua yoyote ambayo itapuuza haki za watu wa Palestina…/