Msomi na mwanafikra mashuhuri raia wa Uganda, Mahmood Mamdani, ambaye ni baba wa Muislamu wa kwanza kushinda nafasi ya umeya wa New York huko Marekani, Zohran Kwame Mamdani, ameishutumu Israel kuwa ni “nguvu ya uchokozi ambayo imepoteza hisia zote za maadili,” na kwamba hakuna anayeamini kwamba kile inachofanya huko Gaza ni “kujilinda” kama inavyodai.
Akizungumza na Televisheni ya Al Jazeera ya Qatar, Mahmood Mamdani amesema kwamba dunia haiiwajibishi Israel, si kwa sababu haina uwezo au ni kitendo hicho halali, bali kwa sababu utawala huo umejenga nafasi yake ya kimaadili kwa madai ya kuwatetea waathiriwa wa Holocaust na Vita vya Pili vya Dunia.
Ameongeza kuwa: “Lakini sasa barakoa limeondolewa, kifuniko kimeraruliwa na ukweli umefunuliwa kwa watu,” ikiwa ni matokeo ya “gharama kubwa iliyolipwa na watu wa Gaza, lakini si gharama isiyo na maana.”
Mwanafikra Mamdani amesema kwamba, Gaza imekuwa maabara ya Israel kwa ajili ya kujaribia aina mbalimbali za silaha kwa muda mrefu na kisha kuziuza nchi za nje. Amesema: “Israel imeua watu wengi huko Gaza bila kuwajibishwa au kulipa gharama yoyote ya kisiasa, ikidai kwamba inajilinda, kutokana na kukubalika jambo hilo kwa Magharibi, na ukimya wa ulimwengu mwingine.
Amesema: Ingawa Israel imewaua zaidi ya watu laki moja (100,000) huko Gaza, kujeruhi na kulemaza karibu nusu ya idadi ya watu, na kuwalazimisha maelfu ya wengine kuhama makazi yao, la kushangaza ni kuendelea kusimama kidete watu Gaza na kukataa kuondoka katika nchi yao.
Ameendelea kusema, “Wakimbizi wa Gaza walioonja mashaka ya Nakba 1948 wanasema, ‘Tulijifunza kutokana na tajiriba ya risasi kwamba hatutaondoka tena katika ardhi yetu. Tuliondoka katika ardhi yetu ili kuokoa maisha yetu, na tukaipoteza. Hapa Gaza, tutabaki katika ardhi yetu.”
Kuhusu ushindi wa mwanaye, Zahran Mamdani, katika kinyang’anyiro cha kugombea kiti cha Meya wa Jiji la New York, Mahmood Mamdani, ambaye ni profesa wa Chuo Kikuu cha Columbia huko Marekani, anasisitiza kwamba haikuwa rahisi kwa Zahran kushinda nafasi ya “Meya wa New York,” na kwamba mwanaye alikabiliwa na kundi kali lililotumia pesa kukabiliana naye na kumwaga dola milioni 25 dhidi yake, lakini hilo halikufanikiwa.
Zohran Mamdani anakuwa Muislamu wa kwanza kuchaguliwa kuwa Meya wa 111 wa jiji la New York, mtu wa kwanza mwenye asili ya Asia Kusini na wa kwanza aliyezaliwa barani Afrika kuongoza jiji kubwa zaidi nchini Marekani.
Zohran Kwame Mamdani amekuwa akilaani mashambulizi ya kijeshi ya Israel huko Gaza na mauaji ya kimbari yanayofanywa na utawala huo dhidi ya raia wa Palestina, na ameahidi kuheshimu waranti wa kimataifa wa kumkamata Waziri Mkuu wa Israel, Benjamin Netanyahu, uliotolewa na Mahakama ya Kimataifa ya Uhalifu (ICC) iwapo atafanya safari katika mji huo.