Mahakama ya juu zaidi ya Umoja wa Ulaya imetoa hukumu kwamba Poland inalazimika kuzitambua ndoa za jinsia moja zilizosajiliwa katika nchi zingine wanachama wa umoja huo japokuwa mahusiano kama hayo yako kinyume cha sheria kulingana na sheria za kitaifa za nchi hiyo.
Taarifa iliyotolewa na Mahakama ya Haki ya Ulaya (ECJ) imesema Warsaw ilikiuka sheria ya EU ilipokataa kutambua ndoa za raia wawili wa Poland waliosajiliwa nchini Ujerumani mwaka 2018. Baada ya wanandoa hao kurudi Poland, mamlaka ilikataa ombi lao la kuingiza cheti chao cha ndoa cha Ujerumani katika usajili wa kiraia wa Poland, ikisema sheria ya taifa ya nchi hiyo hairuhusu watu wa jinsia moja kufunga ndoa.
Poland, ambayo ni nchi yenye Wakatoliki wengi inatambua aina zote mbili za ndoa, yaani za kiraia na kidini lakini imekataa ndoa za jinsia moja, licha ya kuandamwa kwa miaka mingi na mashinikizo ya Umoja wa Ulaya. Chini ya Katiba ya Poland, ndoa inatafsiriwa kama “muungano wa mwanamume na mwanamke.”
ECJ imedai katika hukumu yake kwamba kukataa kuitambua ndoa hiyo kunakiuka hakikisho lililotolewa na EU kuhusu uhuru wa kutembea na haki ya kuheshimu faragha na maisha ya familia.
Uamuzi huo wa lazima wa mahakama ya EU umetolewa siku moja baada ya Rais wa Poland Karol Nawrocki kuutuhumu umoja huo kwa alichokiita “wendawazimu wa kiitikadi” na kuonya dhidi ya kuenea kwa ukiritimba. Amesema Poland ilitarajia fursa za kiuchumi na uhuru wa kutembea ilipojiunga na umoja huo, sio kuingiliwa katika mfumo wake wa kisiasa au sheria kuhusu maisha ya familia.
Nawrocki, ambaye alichaguliwa mwezi Juni kupitia jukwaa la maadili ya Kikatoliki na kuimarisha mamlaka ya taifa ya kujitawala wa Poland, alisema mwezi uliopita kwamba, atakataa kusaini muswada wowote unaodhoofisha hadhi ya ndoa inayolindwa kikatiba.
Poland ni moja ya nchi tano wanachama wa EU ikiwa ni pamoja na Bulgaria, Lithuania, Romania, na Slovakia ambazo hazijatambua kisheria mahusiano ya maingiliano ya kimwili ya watu wa jinsia moja…/