Dar es Salaam. Wakati matukio ya ukatili dhidi ya watoto yakizidi kuripotiwa kila kona, Shirika la SOS Children Village limeendelea kuwanoa wataalamu mbalimbali ili waweze kusaidia kupunguza matukio hayo katika jamii.
Wataalamu hao wananolewa kupitia programu ya miezi sita inayolenga utoaji wa malezi mbadala au kambo yakiwa ni ufadhili wa Shirika la Fair Start Denmark .
Utolewaji wa mafunzo hayo unalenga kugusa hasa watoto yatima na wale wanaotoka katika mazingira magumu ili waweze kulelewa katika misingi na maadili yanayofaa.
Akizungumza leo Novemba 27, 2025 katika hafla ya kukabidhi vyeti kwa wahitimu 120, Katibu Mkuu Wizara ya Maendeleo ya Jamii, Watoto na Makundi Maalumu, Dk John Jingu amesema anaamini watoto wakilelewa na kutunzwa vizuri kwenye familia inajenga uhakika wa kesho iliyo salama na kinyume chake.
Hata hivyo, baadhi ya watoto hukosa bahati ya kulelewa na familia kwa sababu mbalimbali ikiwemo wazazi kufariki dunia na wengine hulazimika kukaa mitaani na kufanya kazi huku wakiwa na mahitaji maalumu.
“Baadhi hukosa fursa ya kulelewa na familia ndiyo maana Serikali imekuja na malezi ya mbadala kwani watoto wote wanahitaji kulelewa vizuri,” amesema.
Ili kufanikisha hilo walezi wanatakiwa kufanya kazi yao kikamilifu kwani kumekuwa na malalamiko ndani ya jamii juu ya wazazi wa kambo kuwanyanyasa watoto licha ya wengi kufanya kazi vizuri.
“Lakini si kila mtoto anabahatika kupata walezi wa kambo wazuri ndiyo maana tumeweka utaratibu wa baadhi ya taasisi kwa hiari yao wanashirikiana na Serikali kutoa malezi mbadala.
“Serikali tuna makao ya kutoa malezi hayo ikiwemo Dar na Dodoma ina tunashukuru kuna makao 404 yanayotoa malezi mbadala na wanafanya kazi nzuri,” amesema.
Amesema pia wapo watu wa kuaminika 1,803 wanaotoa malezi mbadala ambapo wakati mwingine hukosa sifa za kutosha kufanya kazi hiyo.
“Hiyo ni kwa sababu watoto yatima na wanaoishi mtaani wana uhitaji wa kipekee kihisia wakati mwingine wameumizwa nafsi zao wanahitaji mlezi awe na sifa za ziada, baadhi wako nazo lakini wengine wanatakiwa wafundishwe.
“Nimepitia mmejifunza mengi juu ya kuwasaidia watoto ikiwemo wale waliopitia trauma hii ni kwa sababu wamekuwa wakihitaji sifa za peke yao ili uweze kuwahudumia,” amesema.
Amesema kuhitimu leo ndiyo mwanzo wa safari ya kufundisha wengine namna ya kutoa malezi ya kambo kwa uzuri zaidi huku kwani uhitaji ndani ya jamii upo kwa kiasi kikubwa.
“Elimu mliyopata mkiwapa wengine mtasaidia wengi sana wenye uhitaji ndani ya jamii,” amesema.
Wanufaika wa mafunzo haya ni maofisa ustawi wa jamii, maofisa maendeleo wa jamii, wasimamizi wa makao ya watoto na walezi kutoka mikoa mbalimbali nchini.
Mmoja wa wanufaika wa programu hiyo, Laizer Kirave amesema wamepata uelewa kuhusu malezi chanya na ulinzi wa mtoto malezi mbadala yanayozingatia haki ya mtoto na namna ya kuwezesha jamii.
Ametumia nafasi hiyo kuomba Serikali iwatambue na kuwasajili kama wakufunzi wa malezi mbadala ili waweze kushirikishwa katika programu za kitaifa zinazohusu malezi mbadala, kwani wanaamini kuna walezi wanaohitaji mafunzo kama hayo.
“Tunaomba jamii na vyombo vya dola muendelee kushirikiana kulinda haki za mtoto na kuhamasisha malezi chanya ili kujenga jamii bora,” amesema.
Mkurugenzi wa SOS Children Tanzania, Thomas Kipingili amesema wanapata malezi mbadala na kuwa na ustahamili wa kujitegemea wanapoanza maisha yao.
“Tunatarajia kuongeza wigo wa mafunzo kwa kutumia wakufunzi hao ili kuboresha malezi ya watoto. Tunaendelea kuboresha ustawi wa malezi ya watoto si tu Tanzania bali na nchi nyingine za jirani,” amesema.