Russia. Katika siku ya kisukari hivi karibuni, pamoja na kampeni ya magonjwa yasiyoambukiza iliyoanza tarehe 12-19 Novemba, moja ya tatizo lililozungumzwa kimataifa ni tatizo la unyanyapaa na ubaguzi kwa watu wanaoishi na ugonjwa wa kisukari.
Watu wanaoishi na kisukari mara nyingi hukutana na unyanyapaa yaani hukumu hasi za kijamii, mitazamo hasi, dhana potofu na ubaguzi, vitu vinavyoweza kuathiri vibaya afya ya kihisia, kiakili na kimwili.
Kutengwa au kubaguliwa ni hali ya watu kukwepa ukaribu au kuishi pamoja na mtu anayeugua kisukari na kubaguliwa kupewa huduma kama vile afya, elimu na ajira.
Unyanyapaa hupatikana zaidi karibu na nyumbani, kutoka kwa marafiki, jamaa na wanafamilia.
Katika jamii unaweza kusikia watu wakimsema na hata kukaa naye mbali mgonjwa mwenye kisukari ambaye tayari mwili umepungua ghafla na kukonda, na pia anapokuwa mwenye uchovu na dhaifu hatimaye kushindwa kufanya kazi.
Kunyanyapaliwa na kubaguliwa na wenza wao, aidha kutokana na madhara ya kisukari inaweza kusababisha kupungua nguvu za kiume.
Ukweli ni kwamba kisukari kinapodhibitiwa na kushikamana na matibabu tatizo la ukosefu wa nguvu za kiume hutoweka.
Vile vile wanawake hupata hali ya kunyanyapaliwa na kutengwa na wenza, kwasababu ya kupata maambukizi ya mara kwa mara ikiwamo U.T.I na fangasi. Ukweli ni kuwa, kisukari kikidhibitiwa hali hizi hazijitokezi.
Tatizo la unyanyapaa na ubaguzi linachangiwa na jamii kutokuwa na uelewa, kusambaa kwa dhana potofu na kutoelewa kuhusu sababu, usimamizi na uhalisia wa kisukari.
Wagonjwa wanapokutana na vitendo hivyo huumia kihisia ndani ya mioyo yao, hatimaye kuwa katika hatari ya kupata matatizo ya kiakili ikiwamo msongo wa mawazo, kutojiamini na wasawasi.
Taarifa ya mtandao ya Diabetes UK na jumuia ya madaktari wa kisukari nchini Uingereza, zinaonyesha kuwa asilimia 77 ya watu wanaoishi na kisukari nchini Uingereza huripoti matatizo ya kiakili.
Kote Uingereza watu nane kati ya 10 wenye ugonjwa wa aina ya 1 na watu saba kati ya 10 wenye ugonjwa wa aina ya 2, wanasema wanalaumiwa na kuhukumiwa kutokana na hali zao.
Karibu watu sita kati ya 10 waliowahoji walisema unyanyapaa huathiri kujiamini kwao na zaidi ya nusu pia hujikuta katika aibu hiyo na kuamini kuwa wao ndio wenye kosa kuugua ugonjwa huo.
Takwimu za kimataifa zinaonesha kuwa zaidi ya asilimia 40 ya watu wenye kisukari katika baadhi ya nchi hawajui kwamba wana ugonjwa huo. Hivyo sio sahihi kumnyanyapa wakati hujui hali yako kiafya.
Katika maeneo ya kazi, watu saba kati ya 10 watu wanakabiliwa na unyanyapaa na upotevu wa tija kazini. Watu wanne kati ya watano wenye kisukari hupata uchovu wa kisukari.
Kujitunza, upatikanaji wa huduma bora za afya na fursa za kijamii na kitaaluma, ni muhimu ili kuharakisha kukomesha unyanyapaa na ubaguzi kwa wanaoishi na kisukari.