Dar es Salaam. Katika hatua muhimu kwa sekta ya benki nchini na uongozi wa taasisi za kibiashara barani Afrika, Mkurugenzi Mtendaji na Ofisa Mtendaji Mkuu wa Benki ya NMB, Ruth Zaipuna, anatarajiwa kuzungumza katika Cambridge Africa Business Conference 2026, utakaofanyika Mei 30, 2026 katika Chuo cha Biashara cha Cambridge Judge nchini Uingereza.
Zaipuna anatarajiwa kutoa hotuba kuhusu safari ya mageuzi ya NMB na mchango wake katika uchumi wa Tanzania, akieleza namna taasisi hiyo ilivyokua kutoka katika mizizi ya huduma ndogo za fedha hadi kuwa moja ya benki zinazoongoza nchini.
Ushiriki wake unaiweka NMB na Tanzania katika mjadala mpana wa kimataifa kuhusu biashara za Afrika, fedha endelevu, ubunifu na uongozi wenye kuleta mabadiliko.
Pia, unadhihirisha kuongezeka kwa nafasi ya taasisi zinazoongozwa na Waafrika katika mijadala inayohusu mustakabali wa huduma za fedha barani Afrika.
Mkutano huo wenye kaulimbiu ya “Kujenga Mustakabali wa Afrika: Mitaji, Ubunifu na Ukuaji wa Kiwango cha Bara,” unawakutanisha viongozi wa biashara, wawekezaji, waasisi wa kampuni, wanafunzi na wadau wa sera kujadili nafasi ya Afrika katika kuchochea ukuaji wa baadaye.
Kaulimbiu hiyo inagusa mabadiliko ya mifumo ya mitaji, kupanuka kwa ubunifu kutoka huduma za kifedha za kidijitali kwenda sekta halisi za uchumi, pamoja na umuhimu wa kujenga taasisi na biashara zenye uwezo wa kukua katika kiwango cha bara kupitia AfCFTA.
Akizungumza kabla ya ushiriki huo, Zaipuna alisema mwaliko huo ni heshima kwa NMB na Tanzania, na unaonesha namna taasisi za Afrika zinavyoendelea kutambulika katika majukwaa makubwa ya kimataifa.
“Hii ni heshima kwa NMB na kwa Tanzania. Simulizi yetu siyo tu kuhusu ukuaji wa benki moja; ni kuhusu kile ambacho utekelezaji wenye nidhamu, uongozi wenye dira na uaminifu vinaweza kufanikisha katika soko la Afrika,” amesema Zaipuna.
“Cambridge tutashirikisha namna NMB ilivyobadilika huku ikiendelea kubaki karibu na jamii, biashara na vipaumbele vya taifa tunavyovihudumia.”
Zaipuna amesema uzoefu wa NMB unaonesha kuwa taasisi za Afrika zinaweza kushindana kwa viwango vya kimataifa huku zikiendelea kutoa mchango wa moja kwa moja katika maendeleo ya ndani.
“Mageuzi ya NMB yamejengwa juu ya watu, ubunifu, ujumuishi na ustahimilivu. Tunaamini taasisi za fedha za Afrika zina nafasi muhimu katika kujenga ukuaji endelevu, kupanua fursa na kuonesha kuwa ubora wa kiwango cha dunia unaweza kujengwa ndani ya bara letu,” ameongeza.
Ushiriki wake unatarajiwa kuongeza mwonekano wa Tanzania katika majukwaa ya kimataifa ya biashara na taaluma, sambamba na kuonesha ushawishi unaokua wa taasisi za fedha za Afrika katika mijadala ya ukuaji endelevu, huduma jumuishi za kifedha na uongozi wa kuendana na nyakati.