Mpango mpya wa Marekani wa kumaliza vita huko Gaza uko mezani. Marekani imewasilisha mapendekezo yake kwa nchi za eneo hilo kando ya Mkutano Mkuu wa Umoja wa Mataifa mjini New York. Wakati Waziri Mkuu wa Israel Benjamin Netanyahu alisisitiza upinzani wake kwa taifa la Palestina, Paris na Washington wanaamini bado kuna nafasi nzuri ya kuridhisha pande husika.
Imechapishwa:
Dakika 2 Wakati wa kusoma
Matangazo ya kibiashara
“Haya yote yanakutana,” kimesema chanzo cha kidiplomasia cha Ufaransa. Maoni kutoka kwa mkutano kati ya Donald Trump na nchi kadhaa za Kiarabu kwenye Umoja wa Mataifa siku ya Jumanne, Septemba 23, yalikuwa chanya, kulingana na Paris. Na mpango mpya wa “pointi 21 wa amani katika Mashariki ya Kati na Gaza” uliowasilishwa na Washington umepokelewa vyema.
Waziri Mkuu wa zamani wa Uingereza Tony Blair na Jared Kushner, mkwe wa Donald Trump, wamerekebisha mpango wao: badala ya mpango wa awali wa Marekani, wanapendekeza mamlaka ya mpito bila Hamas, moja ya pointi muhimu za mpango mwingine ulioandaliwa na Ufaransa na Saudi Arabia, anaeleza mwandishi wetu maalum huko New York, Julien Chavanne.
Mkutano kati ya Trump na Netanyahu
Mapendekezo hayo pia yanahusu “wasiwasi wa Israel,” kulingana na mjumbe wa Marekani Steve Witkoff, ambaye ametangaza kuwa “ana matumaini, na ningesema hata kujiamini, kwamba katika siku zijazo, tutaweza kutangaza aina fulani ya mafanikio.” Donald Trump ndiye pekee anayeweza kumshawishi Benjamin Netanyahu. Wawili hao watakutana siku ya Jumatatu, Septemba 29, katika Ikulu ya White House. Mkutano ambao unaweza kubadilisha kila kitu, anatumai mwanadiplomasia wa Ufaransa.
Wakati huo huo, Waziri Mkuu wa Israel anatarajiwa katika Umoja wa Mataifa siku ya Ijumaa, ambapo, kama ukumbusho, nchi 142-robo tatu ya nchi wanachama- zilipiga kura kwa Azimio la New York la kutambua Taifa la Palestina.
Siku ya Alhamisi, makao makuu ya Umoja wa Mataifa pia yataandaa mkutano kuhusu mustakabali wa shirika la Umoja wa Mataifa la wakimbizi wa Kipalestina (UNRWA), linaloshutumiwa na Israel kwa kushirikiana na Hamas. “Kwa miaka 75, UNRWA imetoa elimu ya msingi bila malipo kwa mamilioni ya wakimbizi wa Kipalestina katika eneo hilo. Lina mipango na uwezo wa kusaidia kurejea taratibu kwa elimu huko Gaza, mara tu usitishaji vita utakapotangazwa,” Mkuu wa shirika hilo, Philippe Lazzarini, amesema katika taarifa siku ya Jumatano.